Davao City – Ginahisgutan na karon sa Davao City Overland Transport Terminal (DCOTT) ang posibleng pagbalik sa 24-hour operation sa terminal.
Sa interbyu sa DXDC RMN Davao kang Aiza Usop, DCOTT Manager, gibutyag niini nga mihangyo ang pipila ka bus companies kung pwedeng mabalik ang kanhi 24 oras nga biyahe labi na nga giwagtang na usab ang curfew sa syudad sa Davao.
“Mao na ang pagahisgutan nato kay naa ‘tay mga buses sama pananglitan aning padulong sa Cagayan de Oro City nga naga-request sila sa atoa nga basi’g pwede napud nato ibalik sa 24 hours nga open ang atoang DCOTT terminal,” sulti ni Usop.
Matud ni Usop, napaabot na usab ang maong plano ngadto sa Land Transportation Franchising and Regulatory Board (LTFRB)-XI ug kini kasamtangang ginatuki.
Sa kabahin sa DCOTT Manager, mas maayo ang pagbalik sa 24 hours nga biyahe aron nga makasakay gihapon ang mga pasahero bisan sa unsang oras ug malikayan ang illegal vans nga nagabiyahe sa gabii.
Ugaling mapatuman ang maong plano, magbaton usab og adjustment ang terminal pinaagi sa pagbutang og DCOTT personnel sa gabii labi na nga padayon gihapong gina-implementar ang minimum public health standards batok Coronavirus Disease 2019 (COVID-19).
RadyoMaN Kirby Manzon
