Davao City – Mibaha ang daghang reaksyon sa publiko bahin sa bag-ong regulasyon sa curfew nga 7PM to 5AM subay sa Executive Order No. 55 Series of 2020 nga gipagawas sa City Government of Davao epektibo sugod Huwebes (October15, 2020) hangtud sa December 31, 2020.
Matud sa usa ka dabawenyang si Precy Aguilon, sayo ra kaayo ang alas-7 sa gabii nga curfew diin luoy ang mga negosyante nga hinay-hinay pa nga nag rekober sa pandemic.
Segun usab sa usa ka netizen nga si Keir Ashley Lim, mas maayo pa kung alas-9 sa gabii sugdan ang curfew aron dili magkara-kara ang tao nga muoli labi na sa nihit nga sakyanan.
Samtang, sumala usab ni Genalyn Clabria, mas maayo ang pag-regulate sa curfew diin malikayan ang paglaag sa mga menor de edad ug posibleng makadugang sa kaso sa COVID-19 (Coronavirus Disease 2019).
Una nang gibutyag ni Davao City Mayor Sara Duterte-Carpio nga ang curfew alang mga tawo rason nga kinahanglang magbaton og adjustment ang mga business establishments aron padayon gihapon ang ilang negosyo luyo sa maong bag-ong direktiba.
“Ang atong curfew is curfew sa tao, walay curfew sa establishment. Kamo na ang mag decide based on sa assessment ninyo sa inyong business,” saysay ni Mayor Sara.
RadyoMaN Kirby Manzon
