Malaybalay City, Bukidnon – Gipalasamatan sa kanhi undersecretary sa Dangerous Drugs Board kon DDB ang kapulisan sa subling pagbalik sa Oplan Tokhang.
Sa interview sa RMN Malaybalay ngadto kang Atty. Clarence Paul Oaminal, usa ka anti-illegal drug advocate gibutyag niini nga maayo kini nga lakang tungod kay nagkinahanglan usab ug ka-abag ang Philippine Drug Enforcement Agency kon PDEA.
Dungan niini nanawagan si Oaminal ngadto sa mga kadagkuan sa PNP nga suportahan ang mga kapulisan sa legal nga aspeto.
Matud niya nga sa iyang obserbasyon sa tibook nasud, taas kaayo ang dismissal sa kaso sa illegal nga droga.
Gipahayag usab niini nga walay pulos ang oplan tokhang kung walay makonbikto nga drug suspek.
Gihagit usab niini ang local government unit sa probinsya sa Bukidnon nga muhatag ug suporta sa kapulisan pinaagi sa paghatag ug call duty allowance.
Sa karon makalolooy ang pulis nga mutambong sa pagdungog tungod kay maoy mu-abaga sa kaon ug pamasahe.
