Bukidnon – Gisibog na usab sa Department of Social Welfare and Development (DSWD) Field Office 10 ang pagbayad sa cash grants sa mga benepisaryo sa Pantawid Pamilyang Pilipino Program (4Ps) nga ilalom sa over-the-counter nga pay-out.
Kini human nakasinati og technical glitches ang DSWD ug Land Bank of the Philippines IT systems.
Matud ni Oliver Inodeo, ang focal person sa DSWD nga sa sulat nga nadawat sa DSWD Field Office 10 gikan kang Edgardo Micayabas, chief executive officer sa FICCO (First Community Cooperative), gipahibalo niini nga dili una nila bayaran ang mga benepisaryo sa 20 ka lungsod ug usa ka syudad nga sakop sa probinsiya sa Bukidnon, Misamis Oriental ug Camiguin tungod kay nagpadayon pa ang IP Sec configuration ug testing tali sa team sa Land Bank of Philippines ug FICCO.
Ang mga apektado nga benepisaryo ilalom sa over-the-counter pay-out sa Bukidnon mao ang nagpuyo sa Kitaotao, Cabanglasan, Libona, ug Malitbog.
Ang FICCO mao ang usa sa mga conduit sa Land Bank of Philippines sa pagbayad sa cash grants sa benepisaryo sa 4Ps.
Gipasabot ni Micayabas nga ang malampuson nga IP Sec configuration usa sa mga post-qualification requirements sa Land Bank of the Philippines’ Regional Bids and Awards Committee X aron mopagawas kini og Notice to Proceed, Purchase Order ug funding alang sa pay-out ngadto sa FICCO.
Duha na ka bayranan o upat ka bulan nga cash grants ang gikatakda unta nga dawaton sa mga benepisaryo sa 4Ps karong bulana, apan dili kini madawat hangtod dili mahuman ang configuration, matud sa FICCO.
Subay niini, gihangyo ni DSWD Field Office 10 Regional Director, Nestor Briones Ramos, ang program manager sa LBP alang sa conditional cash transfer nga dali-on ug solusyonan ang kadelatar sa pagbayad sa mga benepisaryo sa ilang cash grants.
Nasayran nga matag duha ka bulan unta ang pagbayad sa LBP ngadto sa mga benepisaryo sa 4Ps.
Adunay kapin sa 270,000 ka households ang narehistro ug aktibo sa 4Ps sa tibuok Northern Mindanao.
