Isinusulong ni Senator Robin Padilla ang panukala na titiyak sa pagrespeto sa relihiyon ng mga estudyante sa mga educational institution.
Sa ilalim ng Senate Bill 1609 o ang “Protection of Students’ Religious Belief Act” ni Padilla, papatawan ng parusa ang sinumang lalabag sa “right to religion” ng mga estudyante.
Binigyang-diin ni Padilla na nakasaad sa Konstitusyon ang proteksyon at malayang pagpili ng anumang relihiyon o pananampalataya nang hindi nanganganib na mabiktima ng diskriminasyon.
Gayunman, sa mga nakalipas na taon aniya ay kapansin-pansin ang kakulangan ng mga educational institution sa paraan ng pagtuturo nang relihiyon nang walang pinipiling sektor.
Pinakamahirap pa aniya ay ang napipilitan ang mga estudyante na mag-enroll sa religious classes at dumalo sa academic activities na manghihimasok sa sarili nilang pananampalataya.
Alinsunod sa panukala, walang estudyante ang sapilitang ie-enroll sa religious value, lesson, subject, o course na iba sa kaniyang paniniwala.
Ang sinumang lalabag sa probisyong ito ay papatawan ng multang mula P500,000 hanggang P2 milyon o pagkabilanggo na mula anim na taon hanggang walong taon.
