Gisugyot sa Traffic Management Center kon TMC-Malaybalay ngadto sa Department of Public Works and Highways kon DPWH Region 10 nga butangan ug dugang mga signage ang national highway.
Kini ang reaksiyon sa buhatan human ang sunod-sunod nga disgrasya sa Bukidnon nga nagbilin ug ubay-ubay nga kinabuhing nakalas.
Sa interview sa RMN Malaybalay ngadto kang Josehp Jabla, ang head sa TMC gibutyag niini nga gamay ra kaayo nga mga regulatory sign ang makita sa sayre highway sa probinsya.
Matud ni Jabla nga usahay gipahimuslan sa mga drayber ang lapad nga dalan nga maoy hinungdan nga duol usab sa disgrasya.
Dungan niini, magpatabang ang TMC ngadto sa Sangguniang Panlalawigan sa Bukidnon aron hangyuon ang DPWH nga duganga nang mga traffic ug regulatory signage ang national highway.
