Davao City- Sakpan ang usa ka babae sa CCTV camera human niya kuhaa ang usa ka bag-ong himugso nga batang babae sulod sa incubating machine sa Southern Philippines Medical Center.
Gisulod pa sa suspek ang baby sa iyang bag ug dayon misibat kini pagawas sa ospital.
Sa kaguol sa amahan nga mao si Jodery Catulong human wala na ang ilang anak sulod sa incubator, nagpatabang na kini sa kapulisan sa Buhangin Police Station.
Segun sa hepe sa Buhangin PNP nga si Police Chief Inspector Jack Tilcag, bandang alas 2 sa hapon kagahapong adlawa mihimo og hot pursuit operation ang mga otoridad batok sa suspek nga midagit sa baby.
Sa tabang sa security guard sa SPMC nga si Monawer Arip nailhan ang suspek kinsa silingan niya kaniadto sa SIR New Matina ning dakbayan sa Davao.
Arestado si Fulalon Resabal, 39 anyos, minyo og residente sa maong lugar ug kasong kidnapping ang ipasaka batok sa suspek.
Nagmalampuson sab ang mga otoridad sa pagrecover sa baby kinsa giidentify sab mismo sa iyang amahan.
Samtang wala mihatag og pamahayag ang suspek kalabot sa pagdagit sa baby sulod sa ospital atol sa interbyu sa DXDC RMN Davao niini.
Kasamang Aimee Guinita
