Sagay City – Bangod kay nagadamo na ang populasyon sang janitor fish sa Himogaan River, ginpakamaayo sang City Government of Sagay paagi kay Mayor Alfredo Maranoñ III nga tagaan ini sang pagtamod sa bulig sang mga pomoloyo sa palibot mismo sang amu nga suba.
Suno kay Helen Javier – Arguelles, ang City Tourism and Information Officer nga sa ika-21 anyos nga Charter Day celebration sang Sagay City ila ginpatigayon ang ‘Adlaw sa Suba’ sa diin ika-8 na ini nga tuig nga may ara sang activity sa Himogaan River nga isa sa sentro sang turismo sa syudad.
Isa sa mga hilikuton amu naman ang pagpangkuha sang mga janitor fish nga suno sa mga eksperto, indi man maayo ang madamo nga populasyon sini bangod ila ginakitkit ang kilid sang suba nga nagaresulta sang soil erosion.
Naobserbahan man nga isa sa mga rasun kon ngaa nga nagalapad ang suba, ina bangod sa padayon nga pagkitkit sang mga janitor fish ilabi na sa kilid sini.
Mga 2,000 ka janitor fish ang ila nakuha sa sina nga adlaw sang kahiwatan.
Ang janitor fish suno sa Department of Science and Technology Philippine Council for Aquatic and Marine Research and Development ang indi man makahalalit sa tawo.
Isa ini ka imported freshwater catfish species gikan sa South America kag nakilala nga aquarium fish sang 1990s.
Ini siya ang nagakabuhi paagi naman sa mga lumot sa sulod sang aquarium kag nagalaba sang 30 centimeters.
Bisan ang iya nga sirik ang indi man delikado kag mahimo man nga makaon ang iya nga unod.
Una ini nga ginbutang sa mga punong sa Laguna apang naglapta sa mga malapit nga suba.
Wala sang nagakaon sini bangod man sa unod nga tuman nga gamay kag posibli mataas ang high metal content. Ang iya nga panit sini ang pwede man himuon nga ‘leather’ bangod pwerte ini ka hunit.
Ang ‘Adlaw sa Suba’ sang Sagay ang gin-updan man sang isa ka cooking contest sang ginasiling ‘kayog’ nga manggaranon naman sa Himogaan River.
Ang ‘kayog’ nga daw kaangay sang agihis ang ginhimo nga tinola, menudo, adobo, sisig, kinilaw kag iban pa.
himogaan, charter, maranon,
