Davao City – Suportado sa 10TH Infantry Division Philippine Army ang tribung Obu-Manobo gikan sa hilit nga mga sityo sa Barangay Tambobong Baguio District ning siyudad sa pagdeklara og persona non grata batok sa teroristang CPP-NPA-NDF niadtong petsa 25 ning kasamtangang buwan.
Sumala ni 10th ID Commanding General Major General Jose Faustino Jr. nga pabor ang iyang pamunoan sa hiniusang lakang sa mga tribal leaders ug sa kumonidad sa Obu Manovo sa pagdeklara og persona non grata sa mga terorista diin dagok kini sa mga kumonista tungod anam-anam na silang nawad-an og suporta gikan sa mga lumad.
Segun sa heneral, ang padeklara og persona non grata ngadto sa mga komunista nagpakita lang nga pursigido ang mga lumad sa pag-angkon na sa ilang tawhanong katungod ug kagawasan sa pagprotekta ug pagpreserba sa ilang yutang kabilin ug sa kultura nga giguba ug gitugaw sa cpp-npa-ndf sa dugay’ng panahon.
Matud ni Faustino nga sagad sa mga lumad nga misuporta sa pagdeklara og persona non grata pulos kanhi mga sakop sa Militia ng Bayan, sympathizers ug regular nga mga miyembro sa teroristang CPP-NPA-NDF apan nakahinuklog nga igo lang sila gigamit sa hinungdan nga nakahukom sila nga mubalik sa sabakan sa gobyerno uban sa panaad ang pagsuporta sa kagamhanan sa nasud.
Nasayran nga mukabat sa 600 ka sakop sa tribung Obu Manovo gikan sa hilit nga dapit sa Barangay Tambobong Baguio District ang mi-lagda sa manifesto nga nagdeklara sa CPP-NPA-NDF nga persona non grata atol sa ikatulong adlaw sa gilusad nga peace building seminar nga gipangulohan sa 71 ka tribal leaders sa distrito sa Baguio ning dakbayan.
RadyoMaN Joel Viray
