Davao City- Angayang daygon si Presidente Rodrigo Duterte sa iyang gihimong pagdeklara sa day of protest ugmang adlawa Septembre 21 alang sa tanang mopasibaw kabahin sa dili maayong nasinatian human gideklara ang martial law sa Pilipinas ni kanhi Presidente Ferdinand Marcos niadtong tuig 1972, 45 ka tuig na ang nakalabay.
Sumala ni Antonio “Tony” Ajero batikang kolumnista sa lokal nga mantalaan sa syudad sa Davao, unang higayon kini nga gideklara sa usa ka Presidente ang maong adlawa, aron mopasibaw ang tanang gustong mopadayag batok sa gobyerno sa ngalan sa demokrasya.
Matud ni Ajero, ang gihimo sa presidente usa kini ka higayon sa mga taga-oposisyon aron usab mopasibaw sa ilang mga mulo batok sa kagamhanan sa ngalan sa freedom of expression ug right to peaceful assembly. Gipasabot ni Ajero, moadto lang ang mga pulis kung maghimo na ug kagubot ang mga nagprotesta.
Giklaro usab sa batikang kolumnista, walay pahamtangan ug silot sa mga leader sa oposisyon sa pagpasibaw sa ilang mga wala magustohi sa gobyerno, basta kay dili lang mogamit sa armas aron girahon ang gobyerno.
RadyoMan Bernard Pantallon
