Libuan ka mga mag-uuma sa probinsya sa Sarangani kasagaran mga lumad ang hilabihan ang pagpasalamat human ni-umento ang ilang mga panginabuhi tungod sa programang SAAD kon Special Area for Agricultural Development.
Nahimong SAAD top producer sa organic upland rice sa Sarangani Province sulod sa halos duha (2) ka tuig nga pagpananum, ang lungsod sa Maitum, samtang ang Malungon ang top producer sa OPV o open-pollinated variety sa puting mais, og ang Maasim ang top producer sa mga assorted vegetables kon mga utanon. Aduna pay pagbuhi sa mga pato og kanding.
Tanan ang nakauyon sa formula nga gihatag ni Governor Steve Chiongbian Solon. Og nakita kini sa kadaghanan nga maoy dakong hinungdan nga nagmalampuson ang SAAD program gawas sa pagkugi sa mga mag-uuma, og kana mao ang paghatag og tithes, tungod kay ang tanang grasya ang gikan man sa Ginoo.
Dyes (10) porsyento sa ani sa mga mag-uuma ang ginahatag kini nila sa simbahan kung asa sila nahimutang, ang sobra ang para sa pamilya, ang mahabilin ang para sa sunod nga pagtanum, ang ekstra ang ginapaambit sa mga silingan aron sila usab ang makatanum, og ang pinakaulahing mabilin ang pwede ng ipamaligya.
Nalatid man sa Bibliya ang mga pulong nga nagkanayon: “Pasidunggi ang Ginoo pinaagi sa paghalad kaniya sa unang bahin sa tanan mong abot. Kun himuon mo kini, manghinubra ang mga abot diha sa imong kamalig.”
