General Santos City–Nagpadayon pa ang gihimong imbestigasyon sa kapulisan may kalabutan sa kamatayon sa bana sa pulis nga si Cerme Celda kansa una nang nagkutlo sa iyang kinabuhi pinaagi sa pagpusil sa iyang ulo gamit ang isyung armas sa iyang asawa nga si PS/Sgt. Rochie Celda niadtong adlaw’ng Domingo alas 4:00 sa kadlawon sulod mismo sa ilang panimalay.
Pamahayag ni Police Captain Hilbroun Okurin Chief of Police sa Fatima Police Station nga sa pagkakaron ila na lamang ginapaabot ang resulta sa imbestigasyon sa SOCO aron masuta kung duna bay foul play sa maong paghitabo.
Saysay pa sa opisyal nga ilaha pang sayron kung unsa gayud ang hinungdan sa away sa mag-asawa ug pipila na ka higayon nga-away ang mga nasampit ug nganong misangko kini sa pagpakamatay sa lalaki pinaagi sa pagpusil sa iyang kaugalingon.
Gipaklaro man usab ni Police Captain Okurin nga taga Sultan Kudarat ug South Cotabato ang pinuy-anan gayud sa mga nasampit ug mibalhin lang kini sa Gensan gumikan kay sa PRO 12 na-asign ang asawang pulis.
Kahibaloan nga ayha pa nagpusil ang bana sa iyang ulo duna matud pay natigayon nga panaglalis tali sa duha samtang anaa sa impluwensiya sa ilimnong makahubog ang lalaki nga gikan nagluto sa usa ka kasal sa brgy,mabuhay dihang wala nagkasinabot gikuha sa bana ang pusil sa iyang asawa ug gipusil ang ulo niini nga miresulta sa iyang kamatayon. (Reynald Timario)
