Bukidnon – Dakong kawad-on matud pa alang sa mga New Peoples Army kon NPA ang pagkakumpiska sa mga Improvised Explisve Device kon IED niini kagahapon adlawa.
Sa interview sa RMN Malaybalay ngadto kang PCI Ritchie Yandog, ang hepe sa Valencia City Police Station gibutyag niini nga nakadawat sila ug taho nga adunay duha ka kadudahang mga tawo ang nagdala-dala ug sako sa Purok 5, Lumbo, Valencia City alas 11:55 sa buntag kagahapon.
Human sa mao nga sumbong nga ilang nadawat gilayon nga niresponde ang personahe sa 1st PMFC,2nd PMFC, PIB Buk, CIDG Buk ug Valencia CPS sa mao nga dapit.
Nakamatikod matud pa ang duha ka suspek ug gilayon nga nisibat kini sa mao nga dapit ug gibiyaan ang mga sako nga dala niini.
Sa pagsusi sa otoridad sa sulod sa sako nasuta nga aduna kini mga sulod nga mga IED ug kagamitan sa paghimo niini.
Apil sa ilang narekober ang 21 ka improvised hand grenade, lima ka improvised anti-personnel clamor mines, 2 ka steel pipes, 3 ka PVC pipes, 52.5 meters electrical wires ,3 kilos soluble fertilizer, 200 grams Asupre Chemical Substance, 1k ANFO , 4 ka dynamite, 0.4 grams black powder, 60 pcs improvised commercial electric blasting cap ug daghan pa.
Matud ni Yandog nga posbileng gilikayan sa maong mga suspek ang checkpoint nga gimontar sa kapulisan sa National Highway, Brgy. Lumbo maong sa diversion road kini nangagi.
Sa karon padayon pang gi-ila sa kapulisan ang duha ka suspek ug gituhuan nga miyembro kini sa mga New Peoples Army kon NPA.
