Pagkasunog sa usa ka balay sa Dagohoy-North, ginaimbistigahan pa

General Santos City—Padayon ang ginahimong imbistigasyon sa Bureau of Fire Protection-Gensan kalabutan sa nahitabong sunog sa usa ka balay nga nahimutang sa may Dagohoy Paradise, Barangay North Gensan nga natigayon alas 7:40 ang takna sa buntag kagahapong adlawa.

Ang maong balay gipanang-iyahan sa usa ka Melody Catalan. Sa inisyal nga imbistigasyon sa BFP nanghinlu ang biktima sa palibot sa iyang panimalay dihang kalit lang misinggit ang iyang silingan nga nasunog na ang iyang balay.

Gilayon nga mitawag sa BFP-Gensan ang mga silingan kansa gilayon man nga girespondihan apan tungod sa kalisod sa dalan naglisod ang mga miresponding bombero sa pagsulod sa maong lugar.


Alas 8:11 sa buntag dihang gideklara kining fire out.

Subay sa pahayag sa mga testigo nagsugod matud pa ang sunog sa likod nga bahin sa kwarto ni Catalan diin may gimuntar nga incubator alang sa ilang mga piso sa manok.

Gibana-banaang anaa sa P90,000 ang danyos sa maong sunog apan posible pa kining madugangan higayon makadeklara na ang nanag-iya ug kantidad as mga butang nila nga apil gilamoy sa kalayo.

Facebook Comments