South Cotabato–Nagpadayon ang gihimong imbistigasyon sa Bureau Of Fire Protection, Koronadal sa nahitabong sunog sa usa ka payag nga nahimutang sa Prospero, Barangay GPS, Koronadal City nga gikamatay sa usa ka biktima.
Nasayran nga patay ang usa ka Jenly Palomo, 39, residenti sa Barangay Dumadalig, Tantangan, South Cotabato. Sumala sa silingan sa biktima nga ginganlan lang ug Rumulo nga ala 1:30 ang takna sa kabuntagon dihang kadungog kini ug buto.
Pila ka minutos ang nakalabay, namatikdan nalang niini nga init ang palibot maong iyang gisuta. Didto iyang nakit-an nga dako na kaayo ang kalayo sa payag nga gipuy-an sa biktima.
Gipaklaro sa silingan nga wala siya masayod kung buto sa pusil ang iyang nadunggan ayha nahitabo ang sunog. Apan iyang gibutyag nga pila ka adlaw ang nakalabay ayha nahitabo ang sunog, duna syay nadunggan nga nakalalis ang biktima didto mismo sulod sa iyang gipuy-an.
Sumala pa nga siya gipugos nga lalaki nga paubanon kaniya ug gani siya gibaharan pa nga kung dili mouban, pamatyon ang iyang pamilya. Wala usab nasayod si Rumulo kung si kinsa ang maong lalaki.
