General Santos City–Dako ang katingala ni City Councilor Jeng Gacal nganong naapil ang iyang pangalan sa gikaingong mga narco-politican kon mga politiko nga nalambigit sa iligal nga droga uban ang tulo pa ka mga konsehal sa dakbayan ug pipila ka mga opisyal sa barangay.
Kini ang nahimong reaksyon ni Kagawad Gacal human matud pa niyang nasayran ang maong balita pinaagi sa social media.
Dako ang pagtoo sa konsehal nga peke ug black propaganda ang mikatag nga mga impormasyon aron nga dauton ang ilang pagkatawo ingon man ang ilang karera sa politika.
Dako usab ang duda ni kagawad Jeng Gacal nga may kalabutan gihapon sa politika ang motibo sa pagpakatag sa matud pa sa mali ug makadaut nga impormasyon. Kini gumikan sumala pa kay hapit naman usab ang eleksyon sa tuig 2019.
Nagtoo si Gacal nga ginadaut lang sila sa mga tawo nga interesadong muhupot ug katungdanan sa gobyerno apan walay kapasidad sa kadaugan hinungdan nga mangdaut. Kalabot niini giangkon ni Kagawad Jeng Gacal nga wala na niya ginatagaan pa ug pagtagad ang maong isyu tungod sayod na syang daan nga duna gyuy mga “fake news” dinhi sa nasud.
Matud ni Gacal nga sikat man gud karon ang isyu bahin sa narco-politicians hinungdan nga maoy gibato kanila sa mga gustong mudagan sa eleksyon. Matud ni Gacal nga mutoo lang sya sa susamang mga akusasyon kung gikan mismo sa pnp, pdea ug kang presidente Duterte ang maong impormasyon. (Jordan Britos)
