Nakatakdang tukion ugmang adlawa, Abril 25 ning tuiga sa mga lokal nga mga opisyales sa probinsya sa Bukidnon kung lugwayan ba o kaha pagalibkason ang gipatuman nga general community quarantine sa lalawigan.
Sa interview sa RMN Malaybalay ngadto kang Mayor Renante Inocando, ang Presidente sa League of Municipalities of the Philippine – Bukidnon Chapter gibutyag niini nga nakatakda nila kini hisgutan paghuman sa nahimong anunsiyo ni Pangulong Rodrigo Duterte sa mahimo niniing desisyon sa gipatuman nga enhanced community quarantine sa Luzon.
Matud ni Inocando nga subay sa orihinal nga schedule sa Executive order number 20 ni Governor Zubiri, mahuman na kini karong tungang gabie sa Dominggo, Abril 26.
Gidugang sa Mayor nga sa inisyal nga pagnagsabot-sabot sa mga mayor sa Bukidnon dili na lugwayan pa ang gipatuman nga general community quarantine.
Gikatarungan niya nga walay outbreak sa probinsya bisan pa man nga adunay usa ka positibo sa COVID-19 sa dakbayan sa Valencia.
Nasayran nga apil ang Bukidnon sa mga probinsya nga gikonsidera nga low-risk area sa pagkatag sa COVID-19 nga ipailawom sa general community quarantine. Kini base sa deklarasyon sa national government subay sa gipagawas nga pamahayag ni Presidential spokesperson Harry Roque kaganeha.
