Malaybalay City, Bukidnon – Gibarugan ni Senador Sherwin Gatchalian ang iyang pagpabor sa laing usa ka tuig nga lugway sa Martial law sa Mindanao.
Sa interview sa RMN Malaybalay ngadto kang Senador Gatchalian, gibutyag niini nga base sa ilang gihimong briefing, nasuta nga adunay dakong pag-ubos sa problema sa peace and order sa rehiyon samtang gipatuman ang balaud militar.
Usa matud pa sa tumong sa martial law aron dili na mukatag ang terorismo sa ubang dapit sa Mindanao ug aron mapugngan ang Daesh inspired terror group sa ilang planong pagsabwag ug terroristic activities.
Matud sa senador nga base sa intelligence monitoring sa kasundaluhan nga sa karon padayon ang gihimong pagpangrecruit sa mga teroristang grupo.
Samtang sa interview sa RMN Malaybalay ngadto kang Atty. Czarina Golda Musni ang spokesperson sa Mindanao Observatory for Human Rights gibutyag niini nga supak siya sa extension sa martial law.
Matud ni Atty. Musni nga wala daw siyay nakitang basehan sa paglugway niini.
Samtang sa interview usab sa RMN ngadto kang Datu Didilusan Arroyo, ang chairman sa Moro National Liberation Front kon MNLF-Bukidnon gibutyag niini nga uyon siya sa mao nga dugang extension.
Katarungan niini nga dako ug ikatampo ang martial law sa pagpatunhay sa kahapsay ug kalinaw sa Mindanao.
