Malaybalay City, Bukidnon – Gisiguro karon sa bag-o nga provincial director sa Bukidnon Provincial Police Office nga iyang ipadayon ang kampanya batok sa illegal nga droga.
Sa iyang mensahe sa turn over ceremony, gisiguro ni PSSUPT Benedicto T. Pintor nga ilang himoon ang ilang tahas ilabina ang pagpatuman sa balaud aron sa mahimong luwas ang publiko ug mapabilin ang kahapsay ug kalinaw sa Bukidnon.
Gimanduan usab ni Pintor ang mga kapulisan nga pahugtan pa ang kampanya batok sa illegal nga droga ug pagsumpo sa tanang klase sa kriminalidad.
Gipahinumdom usab sa bag-o nga provincial director ngadto sa mga kapulisan nga bisan aduna kini otoridad nga mupatuman sa balaud apan dili kini bug-os.
Nagpahimangno kini nga kinahanglan sundon pa gihapon ang kamanduan sa balaud, istriktong sundon ang due process ug respituhon ang tahwanong katungod.
Nasayran nga si PSSUPT Pintor gi-endorso mismo ni PNP Chief Ronald dela Rosa kang Bukidnon Governor Jose Maria R. Zubiri isip provincial director sa PNP Bukidnon.
