Kalibo, Aklan – Nakataeana eon sa maabot nga Disyembre 1, 2019 rong pagpahayag it “Iwag kung Kalibonhon sa Kalibo, Pastrana Park.
Suno kay Mayor Emerson S. Lachica nga rayang aktibidad hay dag-unan eon nga ginahimo iya sa banwa it Kalibo kada naga hilangop rong adlaw it kapaskwahan ag sambilog sa mga gina eauman bilang tradisyon ko mga pumueoyong Kalibonhon ag mga Aklanon.
Sa makaron suno kay Mayor Lachica hay padayon ro pag-ubra it giant Christmas tree ag ro magtakod ko mga Christmas lights sa Kalibo Pastrana Pasrk hasta sa may Kalibo Cathedral.
Mas maabo man suno kana ro mga iwag ag Christmas lights nga igabutang sa makaron kumpara ko dati bangud nga abo rong nagpaabot it pagdonar.
Gindugang pa gid ni Mayor Lachica nga ro sa makaron nga giant Christmas tree hay may konsepto bangud nga pagabutangan raya it “ati” nga design nga kung sa siin kung adlaw hay makita ro mga mascara it ‘ati’ agod ma-feel ro nagahilangop nga Kalibo Sto. Niño Ati-atihan Festival 2020 samtang sa gabii ro makita mat-a hay puro iwag.
Ginasaligan man kara ro maabong magasaksi sa nasambit nga aktibidad.
