Davao City – Nanghinaut karon ang usa ka opisyal sa gobyerno nga maaksyonan sa kapulisan ang sunod-sunod nga pagpamatay sa mga kapitan sa brgy. dinhi sa Davao region.
Sumala ni Davao City vice mayor Bernard Al-ag atol sa interview sa DXDC RMN Davao nga dako ang iyang kasubo sa mga panghitabo karon ilabi na nga duha na ka kapitan sa Brgy. sa rehiyon XI ang gipusil-patay sulod lamang sa tulo ka bulan karong tuiga.
Kahinumduman nga gipusil-patay sa wala pa mailhing mga suspek ang Brgy. Captain sa Talandang, Tugbok District ning syudad sa Davao nga si Reynaldo Bonjong Tulang Dumagan sa may Magtuod, Davao City niadtong June 7, 2018 samtang niadtong Abril 21 ning tuiga, gipusil-patay usab si Barangay Kapitan Danilo Nortega Daanton sa purok 9, Golden Plains Subdivision, Barangay Poblacion, Monkayo.
Subay niini, gi-awhag sa bise-alkalde ang katawhan nga mamahimong magmaigmaton kanunay sa palibot ug kung makadawat og mga hulga o death threats, mas labing maayo og i-report kini gilayon sa kapulisan aron maka-assist og subaybay ang mga law enforcement units kabahin niini.
RadyoMaN Renz Barbarona
