General Santos City—Nagpadayon ang gihimong imbistigasyon sa Police Station 2 sa pagpanguna ni Police Mayor Ananiaz Vasquez kalabutan sa pagpamusil patay ngadto sa mag-amahan nga silang si Fred Mamalo, 60 anyos, ug Alenor Amel, 25 anyos , nga pulos nanimuyo sa Prk. 11, Lanton, Barangay Apopong ning syudad human nga gipusil sa wala pa mailhing mga suspect alas 8:30 ang takna sa buntag, sulod sa compound sa ilahang panimalay.
Sumala pa ni Nuralisa Amel, ang asawa sa usa sa mga biktima nga nakadungog matud pa kini ug saba sa gawas sa ilahang panimalay nga gisundan ug sunod sunod nga buto sa pusil kung asa paggawas niini sa iyahang kwarto nakita na niini nga nangahagba na ang mga biktima ug naligo na sa kaugalingon nilang likido. Paspas usab nga misibat ang mga suspek sa wala sayring lugar.
Wala na usab nadala pa sa ospital ang mga biktima human nga nakabsan gilayon sa ilang kinabuhi.
Samtang gibutyag ni Edwin , usa ka habal-habal driver nga anaa sa maong lugar atol sa nahitabong pagpamusil, dawsa suko kaayo ang upat ka mga suspetsadong mipusil sa mag-amahan.
Kalit lang matud pa nisulod ang mga suspect sa maong compound ug gipahapa silang tanan dayun pusil sa duha ka mga biktima sa ilahang mga ulo gani gikuha pa sa mga suspect ang iyahang sling bag nga dunay unod nga cellphone ug rehistro sa motor ayha kini mihawa sa maong lugar.
Possible nga away sa yuta ang usa sa mga motibo sa pagpamusil patay sa mga biktima, kini ang nahimong pagbutyag ni Police Major Ananias Vasquez ang hepe sa Police Station 2.
Sumala pa niini nga niadtong milabay matud pa nga bulan nalakip ang duruha sa misuway ug sulod sa usa ka giilugang luna sa Lanton, Barangay Apopong kung asa posibleng gibalikan ang mga nahisgutan.
Sa karon ang kapulisan wala pay matumbok nga responsible sa maong krimen ug karon anaa palang sila sa pagdetermina sa posibleng motibo niini.(Dave Silagan)
