General Santos City—Usa ang patay samtang usa ang angol sa nahitabong pagpamusil sa wala pa mailhing suspetsado sa national Highway, Barangay Apopong, Gensan alas 9:30 ang takna kagabie.
Biktimang namatay giilang si Roldan Bayloses Lutche, legal age, residenti sa Klinan 6, Polomolok, South Cotabato, samtang ang angol giilang si Antonio Kuan Jr., 45 anyos, residenti sa Purok 12, Barangay Mabuhay, Gensan.
Sa interview sa RMN Gensan News Team ngadto sa biktimang si Antonio Kuan Jr. iyang gibutyag nga gikan sila sa sabungan nga nahimutang sa National Highway, Barangay Apopong uban ang usa pa nila ka kaila nga giilang si Ray Rabago Pardillo, pag abot sa Highway, didto na sila gipamusil sa wala mailhing suspetsado.
Igo si Kuan sa iyang tiil ingon man sa iyang sampot nga bahin samtang si Lutche, nakaangkon ug samad sa nagkandaiyang parti sa lawas ug sa iyang ulo nga hinungdan sa iyang kamatayon.
Nasayran nga nadala pa si Lutche sa Mindanao Medical center apan gideklara na kining dead on arrival.
Sa initial nga imbistigasyon sa Police Station 2 gibutyag nga posibling si Lutche gyud ang target sa maong pagpamusil ug nadamay lang ang iyang kaubanan. Gikaingong si Lutche adunay kasong kalapasan sa RA 9165 ug RA10591 sa Polomolok Municipal Trial Court ug kanhi na usab kining napriso.
Usa sa mga anggulong gitutukan karon sa kapulisan ang bahin sa mga kanhing kaso niini ingon man personal grudge.
