General Santos City—usa patay samtang duha ang angol sa nahitabong pagpamusil sa lamay sa patay sa may Nursery Road, Anas Subdivision, Barangay Lagao, Gensan ala 1:20 ang takna kaganinang kabuntagon.
Biktimang namatay nailhang si Juanito Diaz Jurane, 52, residenti sa Sunrise Subdivision, Barangay Lagao, samtang ang mga nangaangol nailang si Joni Lapenoso Bitacura, 36, Welder ug Aldrin Alinsangin, 43, minyo, residenti sa Anas Subd. sa samang Barangay.
Sa inisyal nga imbistigasyon sa Police Station 3, nasuta nga samtang anaa sa lamay sa patay sa panimalay sa pamilyang Villanueva, nagtan-aw sa mga nagdula ug hantak ang biktimang si Jurane, kalit lang may miduol kaniya nga usa ka lalaki nga nagsul-ob ug itom nga t-shirt, puti nga shortpants, kalo og nakatabon ang nawong.
Walay sulti-sulti iyang gipusil ang biktima upat kahigayon igo sa nagkandaiyang parti sa lawas. Paspas nga misibat ang suspek sakay sa motorsiklong naghuwat kaniya.
On the spot patay si Junare samtang nagbaton ug samad pinusilan sa iyang tiyan ug abaga si Joni Bitacura samtang samad sa iyang kamot ang naangkon ni Aldrin Alinsangin human nadamay lang sa maong pagpamusil.
Narekober sa kapulisan sa crime scene ang (1) ka empty shell sa caliber .45 pistol. Sa karon padayon ang imbistigasyon sa kapulisan kalabutan sa insidenti ug ginasuta pa ang motibo sa maong krimen.
