General Santos City—Nagpadayon ang gihimong imbistigasyon sa Polomolok Municipal Police Station sa nahitabong pagpamusil sa area sa Purok 2, Barangay Crossing Palkan, Polomolok, South Cotabato , alas 7:30 ang takna sa buntag niadtong Domingo.
Nasayran nga patay ang biktimang si Condrad Abay-abay, hingkod ang pang-edaron ug residenti sa Barangay Koronadal Proper ning dakbayan, samtang angol ang igsuon niining si Alberto Abay-Abay, hingkod, residenti sa samang lugar.
Gibutyag ni Police Sr. Inspector Romeo Albano nga gikan sa Purok 1, Polonoling sakay sa tricycle ang managsuog uban sa ugangan ni Condrad nga si Alex Podinao apan pag abot sa utlanan nga bahin sa Tupi ug Polomolok, didto na sila gipamusil gamit ang kalibre 45 nga pistol.
Dugang pagbutyag ni PSI Albano nga padulong unta ang mga biktima sa Polomolok Gallera aron nga manabong apan gisundan sila sa mga suspetsadong sakay sa tulo ka motorsiklo ug gipamusil.
On the spot patay ang biktimang si Condrad samtang gilayon nga gidala sa pribadong tambalanan sa Koronadal ang biktimang si Alberto. Nasayran nga ginaugan pa sa usa ka suspek ang biktimang si Condrad ug gitiwasan ug pusil hangtod nga namatay ayha sila misibat saw ala sayring lugar.
