General Santos City–Duha ka mga anggulo ang gilantaw karon sa kapulisan sa pagpusil patay sa usa ka Jun-Jun Maguan, 29 anyos, nga nanimuyo sa purok 7-B, Brgy.Kawas Alabel Sarangani Province, ala 1:30 ang takna sa sayong kabuntagon sa nasampit nga lugar.
Sumala pa ni Police Captain Bobby Maghirang ang Deputy Station Commander sa Alabel PNP nga unang anggulo nga ilang gilantaw sa pagpusil kay Maguan mao ang paglambigit niini sa pag ambush sa mag-igsoong Nietes pipila ka bulan na ang milabay sa ilahang area of responsibility.
Kahibaloan nga una nang gipusil patay si Maguan samtang pagawas kini sa iyang panimaly sakay sa motorsiklo kalit matud pang gibabagan sa duha ka wala mailhing suspek sakay usab sa motorsiklo ug diretso pusil sa nasampit igo sa makadaghang higayon sa lawas nga miresulta sa iyang kamatayon
Dugang pa ni police captain bobby maghirang nga ikaduhang anggulo nga ila usab nga gilantaw sa kamatayon ni Maguan mao ang paglambigit niini sa pag-angkon sa yuta sa pamilyang Hilado nga anaa ra usab nahimutang sa Brgy.Kawas sa naasoyng munisipalidad.
Nasayran nga human sa insidente paspas misibat ang mga suspek palayo sa lugar samtang ang biktima gilayon pang gidala sa mga nagpakabanang residente sa ospital sa pamasin nga masalbar pa ang kinabuhi niini apan gideklara kining dead on arrival sa attending physician. (Reynald Timario)
