General Santos City–Pagpaklaro ni Police Major Johnrick Medel ang Deputy Station Commander sa Polomolok PNP nga usa lamang ka isolated case sa pagpusil patay sa usa ka Jordan Eleccion Malusay, 27 anyos, minyo ug nanimuyo sa Purok Sunrise, barangay Pobalacion, Polomolok, South Cotabato kansa gipusil sa duha ka wala mailhing suspetsado bandang alas 5:45 sa gabie niadtong milabay nga semana.
Sumala pa ni medel nga ang biktima usa ka miyembro sa gikaingong SUKARAP ug nagtuo ang opisyal nga duna kini nakalaban nga laing grupo kalabutan sa ilahang gimbuhaton hinungdan nga gipusil ang biktima.
Saysay usab sa opisyal nga gikonsidera nga newly identified ang biktima bisan pa man nga wala kini sa watchlist sa kapulisan nga lambigit sa illegal nga droga gumikan kay niadtong milabay nga mga bulan gipahigayonan ug buy bust operation sa kapulisan ang iyang paryente ug target usab ang nasampit sa maong operasyon apan posibling giunhan kini ug pusil sa iyang grupo aron dili na maka-witness sa ilang gimbuhaton.
Giaw-hag usab ni medel ang pamilya nga mopasang-at ug kaso batok sa mga suspek kung mailhan na kini sa kapulisan.
Kahibaloan nga una nang gipusil patay ang biktima samtang gapungko lang kini gawas sa ilang panimalay. Duha ka suspek ang kalit miduol ug diretso pusil sa biktima gamit ang kalibre .45 nga pistola nga miigo sa tulo ka higayon sa ulo niini .
Gilayon man usab gidala sa ospital ang nasampit apan nakabsan lang gihapon kini sa iyang kinabuhi.
Samtang paspas nga misibat ang mga suspek palayo sa lugar sakay sa XRM-125 nga motorsiklo kolor itom nga walay palaka numero.(Reynald Timario)
