51 ka adlaw na lang Pasko na. Human na usab ang pagsaulog sa Adlaw sa mga Santos ug mga Kalag busa wala na’y laing okasyon nga maka wala sa konsentrasyon sa matag usa kanato nga buot mangandam sa pagsaulog sa Pasko. Tungod niini, nagsugod na usab og pagpamilgya ang mga negosyante og Christmas Decorations.
Usa sa mga tinuig nga proyekto sa Misamis Oriental Provincial City Jail (MOPJ) ang paghatag og higayon sa mga piniriso nga makanegosyo maskin anaa lamang sila sulod sa prisohan ug kini ang pagbuhat og mga Christmas Lantern para ibaligya. Usa matud pa kini ka pamaagi nga makasuporta ang mga piniriso sa ilang mga nahibiling pamilya gawas sa prisohan.
Matud pa ni Kenneth, 25 anyos, usa sa mga piniriso nga nahinabi ni Bobby Lalat ug usa sa mga gahimo og Christmas Lantern, nga ang mga materyales nga gapanggamiton sa mga piniriso, pinalit sa ilang mga bisita nga mga sakop sa pamilya, paryente ug mga higala. Dugang pa ni Kenneth nga ang tanang piniriso nga adunay kahibalo ug kahanas sa paghimo og Christmas Lanterns, giaghat nga magnegosyo niini aron dili lang malingaw kundi makasapi usab.
Klase-klase nga desinyo ug kadak-on sa mga Christmas Lantern nga hinimo sa mga piniriso ang pwede nimong mapalit sa MOPJ. Nagdepende na usab sa kadak-on ug sa klase sa mga materyales nga gigamit ang presyo sa mga Lantern. 80 hangtud 100 pesos ang mga Small Sized Lantern, 200 hangtud 300 pesos ang mga Medium Sized Lantern ug 700 hangtud 1000 pesos usab ang mga Large Sized Lantern nga maoy kasagarang gakahalin.
Ang maong mga Christmas Lantern naka-display sa may kural nga bahin sa MOPJ kung diin pwede kining matan-awan sa mga lumalabay gawas sa maong prisohan.
Aduna ka ba’y reaksyon o pangutana kabahin niini nga artikulo? Mamahimo nimong i-comment sa ubos.
