Davao City – Pagpanimalos ang gilantaw karon sa kapulisan sa Davao del Sur nga anggulo sa pagpatay sa nakaplagang patayng lawas nga walay ulo sa may Purok Riverside, Zone 1, Digos City.
Gibutyag ni Davao del Sur Provincial Director PSSUPT Samuel Gadingan nga aduna na silay mga persons of interests base sa mga pamahayag sa mga saksi.
“Ginaingon nila nga naa daw syay nabangga nga tao kaniadto sa didto sa Sta. Cruz pagkahuman nisibat daw ni siya ug usa pa nga ginalantaw kay kining tawhana bag-o siya nawala nakit-an daw siya nga naglaroy-laroy sa usa ka bar diha sa Digos nga nakig-inom sa mga tao kay kini man gud siya dili sakto ang pangisip basin naa siyay naligsan o nabangga nga mga tao,” sumala ni Gadingan.
Giila ang biktima nga si George Fuentes, kasamtangang nagpuyo sa Ravema, Digos City og lumad sa Sta. Cruz, Davao del Sur.
Niadtong Sabado Agosto 25 nakurat ang mga residente human nga nakaplagan ang lawas sa biktima nga walay ulo samtang sa may Brgy. Cogon, Digos City na nakita ang ulo niini, 300 meters gikan sa Riverside.
Nanawagan karon si Gadingan sa mga nakasaksi o adunay impormasyon sa nahitabong krimen nga muduol sa awtoridad aron masolbad kini ug makab-ot usab ang hustisya sa kamatayon sa biktima.
RadyoMaN Aimee Guinita
