Ginpaiway sang Philippine Ports Authority ang pagpanukot sang 20 pesos nga terminal fee para sa mga pasahero gikan sa Iloilo padulong sa Guimaras nga magaumpisa kuntani kahapon.
Suno kay PPA OIC Manager Engr. Antonio Velarga nga nakabaton sila sang direktiba sang Sabado sang hapon gikan kay PPA General Manager Jay Daniel Santiago nga indi lang anay pagpadayunon ang pagpanukot sang terminal fee.
Ini bilang sabat sa panawagan sang mga opisyales sang Guimaras bangud nagabakho pa ang probinsya tuga sang nagluntad nga Iloilo strait tragedy sang Agosto 3.
Subong man, wala sang ginhatag nga petsa ang PPA kon san-o magaresume ang pagpanukot nila sang terminal fee.
Samtang, gin-athag ni Velarga nga ang terminal fee nga ginasukot sang PPA ang para lamang sa mga pasahero nga magasakay sa fast craft nga nagadungka sa Fort San Pedro wharf kag indi sa Parola kag Ortiz wharf nga ginadungkaan sang mga pumpboat.
