Pagpatay sa kapitan sa Monkayo posibleng bangi sa negosyo

50

Davao City – Nakaestablisar na og inisyal nga motibo sa pagpusil patay kang Monkayo Barangay Pasian Kapitan Joselito Crizaldo Sr. ang Monkayo Municipal Police Station.

Gibutyag ni Police Regional Office 11 Spokesperson Police Chief Inspector Milgrace Driz nga personal nga bangi ang gilantaw nga anggulo sa pagpatay kang Kapitan Crizaldo kinsa gipusil sa mga armado 1:00 gahapon sa hapon sa Poblacion.

Miguwa sa pasiuna nga imbestigasyon nga bangi sa negosyo sa kahoy ang usa sa rason ngano gipatay ang biktima apan wala pa’y persons of interest ang kapulisan sa Monkayo Comval Province.

Wala sab gipadaplin ang posibilidad nga mga sakop sa teroristang New People’s Army ang mipatay sa kapitan gumikan sa trabaho niini isip kapitan sa barangay.

Sa karon, naglusad na og dugang pagduki-duki ang mga imbistigador sa kapulisan sa mao nga lungsod aron hingpit matumbok ang pinaka-ugat hinungdan sa pagpusil patay sa biktima ug aron masikop ang mga mamumuno.

RadyoMaN Joel Viray

Facebook Comments