Polomolok South Cotabato–Gibutyag ni Police Captain Rommel Hitalia, Deputy Station Commander sa Polomolok Municipal Police Station nga hangtod karong panahona wala pa gayud silay matumbok nga suspek ingon man sa motibo sa pagpusil patay sa Tricycle Driver nga si Akmad Mamadra Pasagui nga nagpuyo sa Brgy. Rubber, Polomolok nga nahitabo niadtong milabay nga semana.
Sumala pa ni Hitalia nga tungod sa dili pagkooperar sa pamilya ngadto kanila maglisod sila sa pagresolba sa kaso sa biktima.
Kahibaluan nga una nang gipusil ang nasangpit ala 1:45 sa hapon sa Brgy. Magsaysay samtang nagpaayo kini sa iyang tricycle, kalit kining giduol sa wala mailhing suspek sakay sa motorsiklo ug diretso pusil sa ulo ug lawas sa biktima nga miresulta sa iyang hinanaling kamatayon.
Sa karon nagpadayon ang imbestigasyon sa kapulisan sa posibleng motibo sa krimen ingon man ang ilhanan sa suspek nga kasamtangang gawasnon hangtod karong panahuna. (RV)
