General Santos City–Nagpadayon pa ang gihimong imbistigasyon sa Maasim Municipal Police Station kalabutan sa pagpatay sa usa ka estudyante nga giilang si Alvin Lobo, 28 anyos nga taga Duranta Street, Barangay Kablacan, Maasim, Sarangani Province.
Sumala ni Police Major Romeo Calamba, Chief of Police sa Maasim PNP nga una nang nakaplagan sa mga residenti sa barangay Tampat ang patayng lawas sa biktima daplin sa dalan.
Aduna kini samad pinusilan sa iyang ulo ug uban pang parti sa lawas nga hinungdan sa iyang kamatayon.
Dugang pagbutyag ni Police Major Calamba nga posibleng gilabay lang sa lugar ang patayng lawas sa biktima.
Posible matud pa nga sa ubang lugar gipatay ang nasampit ayha kini gibilin sa lugar gumikan walay nakit-ang timailhan nga adunay nahitabong kumusyon sa lugar hain nakaplagan ang patayng lawas.
Posible usab nga gigapos ang biktima dihang siya gipatay tungod adunay agi sa hikot ang iyang duha ka mga kamot.
