Pagpatay sa usa pulis sa Malaybalay, gi-angkon sa NPA

Gi-angkon sa New People’s Army kon NPA nga sila ang ni-atake sa duha ka mga pulis nga nag-duty sa usa ka police assistance outpost sa Barangay Sumpong ning siyudad niadtong nakalabay nga gabie.

Kini ang gikumpirma ni Dereka Magtanggol, ang nagpailang tigpamaba sa NPA-Bukidnon.

Mahinumduman nga patay ang usa ka pulis nga si PO3 Jerry Tropel ug nasamdan si PO1 Reymar Caña human gipamusil sa upat ka mga suspetsado.


Samtang interview sa RMN Malaybalay ngadto kang PSupt. Al Abanalez, ang hepe sa Malaybalay City Police Station gibutyag niini nga armado sa tag-as ug mugbo nga calibre sa armas nga naglangkob sa M16 ug calibre 45.

Matud ni Abanalez nga ang mga NPA ang naghimo sa mao nga pagpamusil tungod kay sila ang pinaka-threat group nga naglihok sa siyudad.

Matud sa hepe nga base sa kuha sa CCTV footage wala naka-bonnet ang maong mga suspek ug yanong nagbaklay ra kini paingon sa outpost sa mga pulis.

Sa karon nagpadayon ang hot pursuit operation batok sa maong mga suspek.

Samtang gipahayag usab ni Barangay Sumpong Kapitan Roberto Solito sa interview sa RMN nga generally peaceful usab ang iyang barangay ug usa ka isolated case lamang nahitabo kaniadtong nakalabay nga gabie.

Matud ni Solito nga regular usab ang pag-roving sa iyang mga barangay tanod kada gabie.

Hangyo usab niini sa katawhan nga magtinabangay alang sa kahapsay ug kalinaw.

Facebook Comments