General Santos City–Duha ka mga anggulo ang gitan-aw karon sa Police Station 2 kalabutan sa pagpamusil patay sa usa ka vendor nga nailang si Tito Lingko Alyas Nonoy, nga taga Purok 6, Lanton, Barangay Apopong pasado alas-8:42 kagabie niadtong Dominggo.
Sumala ni Police Sr. Inspector Robert Fores, Deputy Chief Of Police sa Police Station 2 nga anggulong ilang gitutukan mao ang robbery ug ang personal grudge.
Nasayran nga una nang gipusil ang biktima sa duha ka suspetsadong nakamotorsiklo kansa paspas nga misibat human sa insidenti.
Dugang pagbutyag ni Police Sr. Inspector Fores nga posibling giatngan nang daan sa mga suspek ang biktima sa lugar.
Samtang basi sa ilang pakighinabi sa pamilya sa biktima, aduna kini bahad sa kinabuhi apan wala nila gidetalye kung si kinsa ang nagbahad sa biktima.
Sa karon ila nalang gipalawman ang gihimong imbistigasyon aron nga masuta kung unsa gyud ang hinungdan sa pagpamusil patay sa nasampit nga vendor.
