Iloilo City- Bangud sang mas ginpabakod nga kampanya kontra sa mga kabataan nga nagalapas sa curfew for minors, naglambot na sa 651 ka kabataan ang nadakpan sang Task force on Moral Values Formation.
Suno kay task force head Jorge Duron, ini nga numero sang nadakpan nga minors sugod Marso tubtob sa ikatatlo nga semana sang Agosto 2017.
Sa sini nga numero, 144 ang gikan sa City Proper, 87 sa La Paz kag Lapuz, 190 sa Jaro, 71 sa Molo, 55 sa Mandurriao kag 104 sa Arevalo.
43 sa mga ini ang second offenders na.
Ginkumpermar man ni Duron nga may walo ka minors nga pasakaan sang kaso bangud makatatlo na ka sunod-sunod sila nga naglapas sa ordinansa agud mapakita nga seryoso ang task force sa pagpatuman sang kasuguan.
Kadam-an sa mga nagkaladakpan nga mainors ang nagalagaw sa kalye kaupod sa ila mga abyan.
Sa idalum sang ordinansa, ang ginikanan sang mga minors amo ang magapangatubang sang kaso kun makatatlo ka beses na nga naglapas sa ordinansa ang ila kabataan.
