General Santos City—Nagpadayon ang gihimong imbistigasyon sa Polomolok Municipal Police Station sa nahitabong pagpinusilay sa gwardya ug sa usa ka residenti sa may Purok 1, Barangay Polo, Polomolok, South Cotabato nga gikamatay sa usa ka gwardya ug pagkaangol sa duha pa ka lambigit sa pinusilay.
Nakabsan ug kinabuhi ang usa ka Sonny Panto, 32, gwardya nga pinyahan ilawom sa FEMJEG Security Agency, residenti sa Purok Aquino Gate, Barangay Cannery site, Polomolok. Samtang mga angol mao silang si Gualberto Gani, 59, gwardya nga taga Barangay Poblacion,Polomolok ug Leonardo De Guzman, residenti sa Purok 1, Barangay Polomolok, Polomolok.
Sa inisyal nga imbistigasyon sa Polomolok Municipal Police Station nasuta nga ayha nahitabo ang pinusilay, alas 11:00 sa buntag dihang miagi si De Guzman uban sa iyang asawa sa may waiting shed duol sa pineapple plantation nga iyaha sa Dhole Philippines dihang sila nakit-an sa gwardyang si Melchor Navarra ug mga kaubanan niini ilang giduol ang magtiayon aron kumprontahon bahin sa nahitabong pagpangbato sa boom truck spray niadtong nakalabayng adlaw.
Didto gidapit ni De Guzman ang mga gwardya nga silang si Sonny Panto, Gualberto Gani, Melchor Navarra, Reynaldo Rabut ug Eduardo Pataray nga tua mag-areglo sa ilang balay apan pag abot sa lugar naglalis si de Guzman ug ang gwardyang si Reynaldo Rabut nga misangko sa pagsinumbagay.
Pila ka gutlo ang nakalabay, mibunlot ug pusil ang duha ka kampo dayon nagpinusilay nga miresulta sa kamatayon ni Sonny Panto ug pagkaangol ni Gani ug De Guzman.
Si De Guzman ug Gani daling gidala sa Ospital ug kasamtangan na karon nga nagpaalim sa ilang mga samad.
