Sindangan, ZDN-Hangtod karon padayon pa gihapon ang gihimong makuti nga imbistigasyon sa kapulisan sa lungsod sa Sindangan may kalabot sa pagpusil sa iladong abogado nga si Atty. Rogelio M. Dumdum didto mismo sa iyang pinuy-anan sa Brgy. Pob. Sindangan.
Kahinumduman nahitabo ang pagpamusil niadtong adlawng Domingo bandang 8:05AM sa dihang kalit lang miabot ang tulo ka wala mailang mga kriminal sakay sa single motor dayong pusil sa makadaghan nga higayon sa biktima.
Dali nga misibat ang mga armado sa wala masayring direksyon samtang si Atty Dumdom dali usab kining gidala sa balay tambalanan.
sa pasiunang resulta sa gihimong pag imbistiga ni PO2 Marlon Bañez, matod pa may kalambigitan kini sa gihawiran nga sensitibong kaso ang hinungdan sa pagpamusil ug kini karon ang gitutukan sa kapulisan sa Sindangan.
Pero ning bag-ohay lang adunay pipila ka mga nanggawas nga mga dagkong pangalan sa personalidad ang gilambigit sa maong pagpusil kang atty. Dumdum.
Kini karon ang gitan-aw kun may kamatuoran ba ang maong mga dagkong pangalan gani gipaabot sa katawhan ilabi na sa mga kaila sa maong abogado kun unsa gayod ang tinuod ug si kinsa ang nagpaluyo sa maong pagpamusil
Sa pagkakaron si Atty. Dumdum padayon pa nga nagpaalim sa iyang samad pinusilan nga naangkon.
