Davao City – Wala na kaabot sa sugat sa Bag-ong Tuig ang usa ka ‘faith healer’ kun manambalay human kini gipusil-patay nahitabo pasado alas-5:00 sa hapon sa Purok 1 Brgy. San Isidro, Bunawan district, siyudad sa Davao.
Base sa report gikan Bunawan PNP, naila ang biktima nga si Reyman Talingting alyas Ondoy, 36-anyos, nagpuyo sa nahisgutang lugar.
Sa inisyal nga imbestigasyon nasayran nga samtang nagtindog ang biktima atubangan sa usa ka tindahan sa maong lugar kalit niabot ang duha ka wala mailhing lalaki nga nagsakay og motorsiklo samtang ang angkas maoy ninaog dayon pusil sa biktima tumong sa ulo gamit ang wala matino nga kalibreng armas.
Ang suspek gibana-banaan nga nagpangedaron og 30-anyos ngadto sa 35-anyos diin nakasuot og color black nga t-shirt ug maong pantalon diin adunay medium built, dark complexion, ug naka skin head.
Human sa panghitabo ang duha ka suspek abtik nga nisibat ug paspas nga nagpadan sakay sa motorsiklo padulong sa siyudad sa Panabo.
Narekober sa crime scene area ang lima ka basiyo sa .45 kalibre sa pistola ug usa fired bullet.
Samtang blanko pa ang kapolisan sa Bunawan ug padayon sa paglusad og halapad nga imbestigasyon aron ma-ila ang suspek nga motorcycle riding in tandem kansa responsable sa pagpusil-patay sa biktima.
RadyoMaN Don Pulayao
