Lapuyan, Zamboanga del Sur – Nagpadayon ang gihimong imbestigasyon sa kapulisan sa Lapuyan kabahin sa pagpamusil-patay sa usa ka timuay nga nahitabo kaniadtong Disyembre 18 ning tuiga sa may alas 8:50 ang takna sa gabie sa Purok Lenaw Gabi, Sayog, Lapuyan, Zamboanga del Sur.
Ang biktima mao si Quizon Situl, 75 anyos, minyo, usa ka Tribal Chieftain (Timuay) ug residente sa Barangay Sayog, Lapuyan, Zamboanga del Sur.
Sa imbestigasyon sa kapulisan nasayran nga samtang ang biktima didto sa iyang maisan, usa ka wala mailhing armadong lalaki ang mipusil sa biktima ug naigo kini sa nagkalain laing parte sa kalawasan nga miresulta sa iyang hinanali nga kamatayon.
Ang suspetsado daling misibat ngadto sa lungsod sa San Miguel, Zamboanga del Sur samtang padayon pa gihapon nga gisuta sa kapulisan sa Lapuyan ang motibo sa naasoyng pagpamusil.
