General Santos City–Dako nga development sa ginahimong imbistigasyon sa kapulisan sa kasong abduction sa manager sa KAPA nga si Remely Iral human nga nakaluwas ang nahisgutan gikan sa kamot sa mga midagit kaniya.
Nasayran nga gilabay sa mga suspek ang biktima sa kapinyahang bahin sa barangay Kablon, Tupi, South Cotabato.
Sumala pa ni Police Major Rexor Canoy ang tigpamaba sa General Santos City Police Office nga sa karon nag-coordinate na ang hepe sa Police Station 4 ug hepe sa Tupi Municipal Police Station kabahin na sa imbistigasyon nga ilahang buhaton aron sayron kung kinsa ang mga suspect nga responsible sa pusil patay sa driver body guard ni Iral nga si Bresnev Morada ug pag suway ug salvage kaniya sa mga suspect.
Sa karon ginasuta pa usab sa kapulisan nganong naka-abot sa pinyahan nga bahin sa Tupi ang nahisgutang biktima ug kung nganong nakalusot sa mga check points sa kapulisan ang mga suspect.
Dili matud pa matumbok sa kapulisan kung paghuman ug dagit sa suspect gilayon siyang gidala sa tupi o aduna pay gihapitan nga lugar ug didto gitago ang nahisgutang biktima sulod sa usa ka simana.
Dugang pa ni Canoy nga sa kalapad usab sa Gensan daghang posibleng lutsan ang mga suspect ug mao kini karon ang ilahang ginasuta kung asa posible milusot ang mga suspect.
Dako usab ang panghinaot ni Major Canoy nga gilayon masulbad ang maong krimen human nga nabuhi ang biktima ug sa kasamtangang naka-admitar sa usa ka pribado nga balay tambalanan.(Dave Silagan)
