Sa privilege speech atol sa regular session niadtong adlaw’ng martes, nihangyo ni Councilor Baguilod sa iyang mga kaubanang konsehal nga gamiton ang ilang mga cellphone dili sa social media ug sa trabaho, kundili lakip na usab sa pagtawag sa ilang mga minahal sa kinabuhi ilabi na sa kadtong suicidal person samtang dili pa ulahi ang tanan.
Gidasig sa konsehala ang mga sakop sa pamilya ug labaw na sa mga ginikanan nga kon mahimo hunungon ang pag-pressure sa ilang mga kabataan nga mupakitang gilas sa ilang pagtuon aron maka-gradwar nga dunay awards ug magtrabaho og maayo aron dali nga mapromotar.
Imbes mangayo og suporta pinansiyal, ang maayong buhaton mao, una kumustahon sila dili lang ka-usa apan sa makaduha ka higayon kay pinaagi ani, hayan masalba pa ang suicidal person gikan sa pagpakamatay.
Nasayran nga usa sa rason nganong makasinati og anxiety ug depression ang tawo mao ang pressure diin kung dili makaya hayan musangko sa suicide. Busa, dako kaayo og kahimoan ang pagpakabana ug pagpangumosta sa ilang kahimtang.
Gisulti pa sa konsehala kinsa Chairman sa Committee on Health sa konseho, ang bisan kinsa puwedeng mahimong manluluwas sa mga tawong nabundakan og daghang suliran sa kinabuhi bisan sa simpleng pagpangutana ug pagpangumosta lang ngadto kanila.
Sa datos, gikan 2016-2023 mukabat na sa kapin gatos ang kaso sa suicide incidents nga natala sa dakbayan sa Davao, butang nga gikaalarma og maayo sa magbabalaud.
Gidasig niini ang mga nakasinati og depression ug mental health problem maingon usab sa mga kabanay nga mudangop sa mga organisasyon sama na lamang sa Philippine Mental Health Association (PMHA) – Davao City Chapter, National Center for Mental Health, ug Hopeline alang sa libre nga konsultasyon, counseling, ug psychotherapy samtang dili pa uwahi ang tanan.
RadyoMaN Joel Viray
