Roxas City, Capiz- Generally peaceful nga ginpatigayon ang pagselebrar sang Paskua sa syudad sang Roxas suno sa hepe sang Roxas City PNP.
Ginpahayag ni Lt Col Ricardo Jomuad Jr nga base sa ila assessment wala man gid sang may ‘significant’ ukon dalagkuan nga nagkalatabo nga insidente sa amo nga tyempo.
Iya man nga ginpunto nga ang natabo nga hacking incident sa Barangay Banica kag stabbing incident sa may bahin sang Barangay Cagay ang makabig nga isolated case gid lamang kun sa diin hinubog ang ginhalinan.
Kadungan sini, ginpasiguro sa gihapon sang hepe sang Roxas City PNP ang hugot nga pag-monitor kag pagbantay sa kalinong kag katawhay sa syudad.
Iya man nga ginpasalamatan ang kooperasyon sang publiko sa panawagan sang PNP nga selebrahon ang holiday season sa matawhay nga pamaagi.
Samtang sa pihak nga bahin ginpasalamatan man ni CPPO Provincial Director Col Julio Gustilo Jr ang hanay sang kapulisan nga sa pihak sang subong nga pandemya, nahimu sa gihapon sang mga ini ang tagsa nila ka mga responsibilidad nga ipabilin ang peace and order subong nga Paskua kag palaabuton ngabBag-ong Tuig.
