Gin-athag sang Palasyo sang Malacañang nga madugay na nga plano ni Presidente Rodrigo Duterte nga isaylo si Customs Commissioner Isidro Lapeña sa iban nga posisyon.
Ini ang pahayag ni Presidential Spokesman kag Chief Presidential Legal Counsel Secretary Salvador Panelo kasunod sang anunsyo ni Presidente Duterte kahapon nga isaylo niya si Lapeña bilang Director General sang Technical Education and Skills Development Authority (TESDA) kag may Cabinet Secretary Rank.
Suno kay Panelo, nauna lang ang announcement ni Duterte bangud sa masunod nga semana pa kon tani ini ipa-gwa sa publiko.
Pila sa mga rason suno sa iya kon ngaa temprano pa ang announcement amo nga masalbar si Lapeña sa madamo nga intriga sa Customs.
Ginpahayag pa ni Panelo nga sobra na ang pagpangguba kay Lapeña gani nadesisyunan ni Presidente Duterte nga gilayon ini isaylo sa TESDA kag ibulos diri si anay AFP Chief Rey Leonardo Guerrero nga halin sa MARINA.
Dugang pa niya nga ini man ang rason kon ngaa nakibot man ang duha sa nangin anunsyo sang Presidente kahapon.
(photo from web)
