Pagsulbad sa krimen sa Davao prayoridad nga gitutokan sa kapulisan

Davao City – Subay sa pag-awhag ni Former President Rodrigo Duterte sa kapulisan sa Davao nga doblehon ang effort sa pagpanarbaho ilabi na sa pagsulbad sa krimen sa syudad, tinguha gayud sa kapulisan sa Davao City ang pagsulbad sa mga krimen nunot sa sunod sunod nga panghitabo sama sa Bragas rape-slay ug mga giingong pagpangdagit sa dakbayan sa Davao.

Kini ang giingon ni Police Major Noel Villahermosa, Station Commander sa Talomo Police Station gani gidugang niini nga usa sa mga primary task ug gitutokan nila mao ang pagsulbad sa krimen aron ma-mintinar ang kahapsay og kalinaw sa dakbayan.

Segun ni Villahermosa, nagkinahanglan usab og tabang o kooperasyon ang kapulisan gikan sa komunidad sama sa pagtunol og mga impormasyon, aron pas-pas nga masulbad ang krimen.

Nahinabi usab sa DXDC News Team si Police Major Rosario Aguilar, hepe sa Ecoland Police Station, diin gisulti niini, prayoridad sa mga awtoridad ang pagsulbad sa krimen apan wala silay mahatag nga eksaktong timeline tungod kinahanglan ang eksaktong ebidensya ug mo-testigo. Dugang niini, kung wala dayoy ebidensya ug witness, muresulta kini sa pagkalangan sa pagsulbad sa insidente.

Una na usab gihagit ni FPRRD ang kapulisan nga mag-resign ugaling di mahatagan og kasulbaran ang mga krimen sa dakbayan.

RadyoMaN Don Pulayao

TAGS; DXDC 621 RMN DAVAO