General Santos City— Gipaklaro ni Gensan City Mayor Ronnel Rivera nga iyahang gi-aprubahan ang plano ni Glenville Gonzales, Hospital Adminsitrator nga sulod ug agency ang mga Job Order ilalom sa maintenance services ug security sa Dr. Jorge P. Royeca hospital.
Sumala niya nga iyahang gihatagan ug kagawasan si Gonzales nga himuon ang tanang maakayo alang sa maong balay tambalanan ug dihang migawas ang suhestyon nga isulod ug agency ang maintenance services iyaha kining gi-aprubahan gumikan sa iyahang nakita ang positibong dala niini.
Usa matud pa sa mga tumong niini aron mahatagan ug pagtagad ang kahinlo sa hospital gumikan kanunay nalang nga ginareklamo ang hilabihang kahugaw sa maong hospital.
Sumala kang Mayor Rivera nga dili man gyud malikayan nga manghinobra ang pasyente sa Dr. Royeca, kinahanglan nga apabilin ang kahinlo niini isip serbisyo sa katawhan.
Dungan matud pa sa pagsulod sa agency sa mukabat 66 ka mga Job Order, ang gipirmahang kontrata nga tanang mga gamit sama sa silhig ug uban pa ang maggikan na sa agency nga maoy midaug sa bidding.
Sa karon matud pa, ginahikay nalang ang tanang dokumento aron nga hingpit ng masulod sa agency ang maong mga Job Order.
