Agud masiguro nga indi makalusot ang illegal nga druga sa siyudad sang Iloilo gikan sa iban nga Probinsya, luyag ni Mayor Jed Patrick Mabilog nga tutukan sang kapulisan ang pagbantay sa mga seaports ilabi na ang mga nagasululod nga mga prutas kasubong sang lanzones gikan sa Mindanao.
Suno kay Mayor Mabilog nga magapatawag siya sang emergecy meeting sa Iloilo City anti-drug abuse council ukon ICADAC agud maghimo sang mga pamaagi kon paano mapunggan ang pagsulod sang druga sa siyudad.
Ginhatagan pagtamod sang alkalde nga ginalantaw man niya ang pag-hire sang K-9 dogs agud magamit sa pagtumod kon may kaupod nga druga ang mga nagasulod nga mga prutas sa puwerto sang siyudad gikan sa iban nga lugar ilabi na ang nagahalin sa Mindanao.
Ginpasiguro ni Mabilog nga komitido ang siyudad sa suporta sini sa kampanya sang Duterte Administration batuk sa Illegal nga druga.(sspunay)
