Gipahayag sa Department of Agriculture kon DA Region 10 nga normal lang ang pagtaas sa presyo dili lamang sa pork products kon dili apil na sa ubang produkto karong holiday season.
Sa interview sa RMN Malaybalay ngadto kang DA-10 Regional Executive Director Carlene Collado, gibutyag niini nga adunay gayuy pagtaas sa presyo sa mga palaliton karong bulan sa Disyembre.
Hinoon, gisiguro ni Collado nga adunay igong supply sa pork products ang Bukidnon.
Wala matud pay angayang ikabalaka sa supply sa baboy tungod kay base sa inventory sa Philippine Statistics Authority kon PSA mulungtad pa sa hangtod 600 ka adlaw pa ang supply niini sa probinsya.
Sigun pa niya nga base sa datus sa PSA ikatulo ang Bukidnon sa tibook nasud sa kadaghan sa production sa baboy.
Samtang, padayon usab ang measures DA-Northern Mindanao aron mapugngan ang pagsulod sa African Swine Fever sa Bukidnon.
Dungan niini, aminado siya nga dili gayod nila mamonitor ug mapugngan ang online selling apan kinahanglan kaayo ang kooperasyon sa katawhan pinaagi sa dili pagpalit ug mga pork products nga dili sigurado kung asa gikan.
