ILOILO City – Nabutang naman sa duha-duha ang posibilidad sang pagbisita ni Presidente Rodrigo Duterte agud magtambong sa ika-50 ka tuig nga selebrasyon sang Iloilo Dinagyang Festival 2018 sa Enero 28.
Ini ang ginkumpermar ni Mayor Jose Espinosa III matapos ginpahibalo sa iya sang appoint office sang president nga may commitment ini sa luwas sang pungsod.
Suno kay Espinosa nga nagduda na sya bangud lainlain nga opisina ang nagapakig-angut sa iya.
Una na nga ginpahayag ni Espinosa nga halos 90% na ang pagbisita sang president kasunod sang ila pagkitaay sa Malacanang kun san-o niya ginpalambot ang imbitasyon.
Nahibaluan nga ginahandaan na kuntani sang syudad ang pagbisita sini alas 2:00 sang hapon sa Enero 28.
Pamatudo diri suno kay Espinosa nga ginahandaan nila ang pagperform liwat sang tatlo ka mga tribu sa hapon kun mag-abot gidman si Duterte.
Handa na ang mga salakyan nga ginahingyo sang advance party nga 20 ka units lakip na ang duha ka set sang identical nga gamiton bilang decoy.
Subong man bangud sang mga pagbag-o sang sitwasyon, 50-50 na ang panan-awan ni Espinosa sang posibilidad sang pagbisita ni Duterte sa syudad.
