Photo taken last November 2 by: Divina M. Suson
Padayun nga supakon ug babagan sa mga residente sa Marawi City ang plano sa gobyerno nga magtukod og bag-ong kampo sa militar sulod sa ground zero.
Kini tungod kay igo na alang kanila ang kasamtangang kampo sa 103rd Infantry Brigade sa Kampo Ranao nga nahimutang kapin kun kulang duha ka kilometro ang gilay-on sa ground zero o gitawag sa gobyerno nga most affected area.
Matud pa ni Queenie Pacalundo nga dili makatabang kanila ang dugang katukuran sa kampo ilabina sa ilang nasinating trauma atol sa lima ka bulan nga giyera niadtong tuig 2017.
Mas makatabang kanila, matud pa, kung tugutan nalang silang makabalik sa ilang tagsa-tagsa ka mga dapit aron sila na ang magtukod og usab sa ilang mga nangagubang pinuy-anan.
Si Pacalundo residente sa Barangay Marinaut, usa sa 24 ka mga barangay sa ground zero, kinsa kasamtangang nagpuyo sa transitory shelter sa lungsod sa Matungao, Lanao del Norte.
Una nang gipasabot sa Task Force Bangon Marawi o TFBM nga temporaryo lang ang maong kampo, aron adunay makabantay sa mga trabahante nga motrabaho sa mga proyekto o istraktura sa gobyerno sulod sa ground zero nga gilaumang matapos sa tuig 2021 . (Divina M. Suson)
